Prokuroria e Posaçme kundër Krimit të Organizuar dhe Korrupsionit ka kërkuar 15 vite burg për Bijan Pooladrag, iranianin që dyshohet për sulme terroriste në vendin tonë.
Mësohet se për shkak të gjykimit të shkurtuar atij i ulet 1/3 e dënimit dhe SPAK kërkoi 10 vite burg në përfundim.
Ai akuzohet për veprat penale “Vepra me qëllime Terroriste”, “Organizata Terroriste”, “Pjesëmarrja në veprime luftarake në një shtet të huaj” dhe “Organizimi për pjesëmarrje në veprime luftarake në një shtet të huaj”.
Bijan Poolagrad është ish-banor i kampit të muxhahedinëve Ashraf 3 në Manëz. Referuar dosjes hetimore, ai është larguar nga kampi dhe ka marrë me qira një shtëpi. Hetuesit kanë dyshime se ai duke përdorur celularin e një vajze, u ka dërguar qeveritarëve iranianë të dhëna për muxhahedinët që janë në vendin tonë, fotografi dhe informacione të tjera.
Hetuesit ranë në gjurmët e vajzës nga komunikimet e shpeshta që kishte me numrat jashtë vendit. Më pas u vërtetua që celularin e saj ia kishte dhënë për ta përdorur Poolagrad.
Pooladrag u prangos në Tetor 2020 nën dyshimin se ishte një agjent iranian me mision për të vrojtuar grupin e muxhahedinëve që ndodhen në Shqipëri.
