Pesë ditë pas vrasjes së Jonida Ccanakut, vazhdon trilleri rreth lidhjes së saj me një 65 vjeccar dhe mënyrës misterioze që u krye vrasja dhe mandej vetëvrasja. Babai i Jonidës nuk e beson se është Sokrat Shani autori i krimit edhe pse ai ka lënë letra të shkruara ku ka pranuar vrasjen e Jonidës para se të vriste veten.
Sefedin Çanaku, shprehet për gazetën “Panorama” se nuk është lejuar nga policia dhe nga morgu që ta shohë kufomën e së bijës. Sipas tij, policia duhet të vazhdojë hetimet, pasi ai nuk beson se ishte një krim për pasion dhe më tej një vetëvrasje nga i dashuri i vajzës.
Çfarë dyshimesh keni ju si prindër të Jonidës?
Nuk di çfarë t’ju them më parë. Kjo histori më duket shumë e mistershme. Unë s’e kam parë për së vdekuri vajzën time. Gruaja, madje, ka dyshime që Sokrati mund të mos jetë fare autor i vrasjes së saj. Sipas saj, ai nuk ishte në gjendje të bënte një gjë të tillë. Po edhe unë dyshoj. Mund ta ketë vrarë edhe ndonjë person tjetër. Policia thotë që ka gjetur letra që i ka shkruar ai para se të vriste veten. Ku janë ato letra, pse nuk m’i tregojnë? Kam dyshime edhe për personat që vinin dhe e merrnin me porosi të tij këtu para shtëpisë. Policia duhet t’i gjejë këta persona. Duhet ta gjejë atë njeri që erdhi e mori këtu të shtunën në darkë. Mbase ai di diçka apo fsheh ndonjë gjë.
Kush ishte personi që e mori atë natë?
Nuk e dimë se kush ishte. Nuk e pamë. Thjesht ndaloi makina para portës dhe vajza doli e iku.
Po makinën e patë, fiksuat ndonjë targë?
Jo, nuk pamë asgjë se ishte shumë errësirë kur doli dhe iku.
Po ndonjë tjetër keni parë, meqenëse thoni që vinin persona të ndryshëm?
Jo, nuk kemi parë asnjë. Por policia e ka të lehtë t’i gjejë ata njerëz dhe t’i pyesë. Të marrë tabulatet e telefonit të vajzës, apo të atij Sokratit, shihet se me kë ka folur ime bijë, apo edhe ai. Të gjithë këta persona janë të dyshimtë për mua.
Po në telefon nuk kishit folur me vajzën që prej asaj nate?
Jo. Nuk ia dinim numrin që ta merrnim. Para pak ditësh kishte ndërruar numrin dhe ia kishte dhënë vetëm të motrës, që është në Greqi. Mori një telefon të ri, që ia bleu ai dhe kishte ndërruar edhe numër. Ajo nuk na kishte marrë dhe ne nuk kishim si ta merrnim.
