Autoritetet greke vazhdojnë kërkimet për kapjen e shqiptarit Klodi Lesi, i cili masakroi me thikë bashkëshorten e tij 10 ditë më parë në Kalkidiki të Selanikut.
Kur kanë kaluar kaq ditë nga ngjarja e rëndë, ende nuk ka asnjë të dhënë se ku mund të jetë fshehur shqiptari më i kërkuar në Greqi për momentin. Fillimisht policia dyshoi se ai mund të ishte arratisur në Shqipëri, duke marrë shkas nga një telefonatë që kishte zhvilluar me një mikun e tij në vendin tonë. Por, një tjetër dyshim i policisë greke është se ai mund të jetë arratisur edhe drejt Italisë. Hetuesit nuk e përjashtojnë këtë pistë, pasi Klodi Lesi ka qenë në Itali në muajin gusht 2015 për të kërkuar punë, pasi ishte divorcuar nga bashkëshortja greke. Megjithatë, kjo pistë mbetet një dyshim i policisë, pasi nuk ka asnjë të dhënë konkrete rreth lëvizjeve të tij. Para disa ditësh, u gjet motori i tij dhe kasollja ku Klodi Lesi kishte qëndruar me djalin 4-vjeçar.
Krahas sensibilizimit të mediave greke, edhe emisioni italian ‘Chi l’ha visto’ në televizionin Rai 3 paraqiti ngjarjen e rëndë që kishte ndodhur. Pas ngjarjes, Klodi Lesi mori edhe njërin nga fëmijët e tij, djalin 4 vjeç, dhe kjo ka bërë që të fillojë edhe një fushatë e madhe mediatike për këdo që jep informacione për vendndodhjen e 34-vjeçarit shqiptar. Autoritetet frikësohen për jetën e fëmijës, kurse gjyshi i 4-vjeçarit ka bërë apel që Klodi Lesi t’i kthejë nipin.
