Presidenti Bjellorus, Aleksandër Lukashenko i ka dhënë lamtumirën e fundit ministrit të tij të Jashtëm, Vladimir Makei,i cili humbi jetën në rrethana ende të panjohura.
Mediat ndërkombëtare raportojnë se tashmë presidenti Lukashnko është në ankth për një atentat të mundshëm ndaj tij dhe për këtë arsye ka ndërruar stafinë e sigurisë, por edhe atë të kuzhinierëve.
Sipas “Daily Mail”, Lukashenko për të hequr çdo dyshim, ka urdhëruar dhe kryerjen e testeve toksikologjike në trupin e ish diplomatit për të sqaruar të gjitha pretendimet për një vrasje me helm.
Gjithashtu edhe ekipi i sigurisë që ishte i ngarkuar për ruajtjen e 64-vjeçarit po i nënshtrohen makinës së të vërtetës.
Dyshimi kryesor është se ministri mund të jetë vrarë dhe se i gjithi ishte një mision i brendshëm, i urdhëruar nga Rusia, në mënyrë që Lukashenko të detyrohej që t’i bashkohej luftës kundër Ukrainës. Mesazhi i kësaj vrasjeje mendohet të jetë një paralajmërim për presidentin bjellorus se mund të jetë ai i radhës, nëse nuk i bindet Moskës.
Ministri Makei ishte ndër politikanët e vetëm të qeverisë në Minsk që nuk ishte nën ndikimin e liderëve të Rusisë, përfshirë presidentin Vladimir Putin. Madje vlerësohej dhe si një pasues i mundshëm i Lukashenkos në drejtim të vendit, dhe duket se kjo mund të ketë ndikuar në fatin e tij, pasi një zhvillim i tillë kërcënonte ndikimin e Kremlinit në udhëheqjen e Bjellorusisë.
Makei do të merrte pjesë këtë javë në një takim të Organizatës për Sigurinë dhe Bashkëpunimin në Evropë (OSBE) në Poloni, ku do të takohej me politikanë dhe zyrtarë kryesorë perëndimorë, një seancë nga e cila u ndalua ministri i jashtëm rus Sergei Lavrov./Opinion.al
