Në një prononcim për Mediaset Premium, menjëherë pas përfundimit të derbit, mbrojtësi i Lazios, Lulic reagon shumë keq ndaj pyetjeve në lidhje me provokime të mundshme nga ana e Rudiger. “Provokimi i Rudiger pas golit të parë? Rudiger në të vërtetë po fliste që përpara ndeshjes, dy vite më parë në Shtutgard shiste çorape dhe rripa, ndërsa tani bën si fenomen. Nuk është faji i tij, është faji i atyre që i qëndrojnë pranë dhe që po rrisin një djalosh të paedukatë. Le të mos merremi me këto provokime të cilat do të përsëriten edhe në të ardhmen. Ky është mendimi im”, shprehet Lulic, pavarësisht kontestimeve që i bëjnë nga studio televizive ndaj komentit të tij të ashpër.
Ndërkohë, nuk mohon se hidhërimi për humbjen është i madh. “Bëmë dy gabime shumë të rënda dhe humbëm ndeshjen. Nuk duhet të bëjmë gabime të tilla. Në pjesën e parë duhej të kishim shënuar të paktën një gol dhe ndeshja do të kishte ndryshuar. Gjithsesi nuk mendoj se kjo humbje na ridimensionon. Kemi humbur një ndeshje pas nëntë ndeshjesh të suksesshme rradhazi. Kampionati është ende i gjatë dhe llogaritë do ti bëjmë në fund”, deklaroi Lulic.
