Mbledhja e Këshillit Bashkiak të Tiranës u zhvillua me tensione në fillim e më pas gjakrat u qetësuan disi pasi kryetari Aldrin Dalipi deklaroi se vendimi për përdorimin e pronave të bashkisë nga privati nuk do të prekë truallin e teatrit kombëtar.
Vetëm me votat e socialistëve u miratua projektvendimi që u lejon sipërmarrësve privatë të zhvillojnë projekte duke shfrytëzuar edhe sipërfaqet në pronësi të Bashkisë. Po kështu u vendos që Parku Rinia të kalojë nën administrimin e Agjencisë së Parqeve dhe Rekreacionit.
Këshilltarët e djathtë (PD, LSI) e braktisën mbledhjen që në nisje të saj duke deklaruar se vendimet e këshillit janë të paligjshme, pasi aty votojnë 6 persona që u është hequr mandati nga gjykata. Kreshnik Collaku kryetari i demokratëve në këshill tha se vendimet e sotme jo vetëm të paligjshme, por janë edhe kriminale pasi shkatërrovet parku Rinia dhe tjetërsohet pronësia e teatrit kombëtar.
Jashtë bashkisë protestuan artistët dhe pas disa minutave u vendos që 3 prej tyre të ndiqnin nga afër mbledhjen e këshillit. Në momentin që ata hynë brenda si n/kryetari i bashkisë, Abaz Hado ashtu dhe kryetari i këshillit Aldrin Dalipi qetësuan artistët duke u thënë se vendimi i sotëm për pronat e bashkisë nuk ka të bëjë aspak me teatrin kombëtar. Madje me propozim të Dalipit në vendim u përcaktua teksualisht “vendimi nuk ka pasoja për truallin e teatrit”.
Artistët, pas votimit dolën jashtë dhe thanë se janë dakord në parim, por gjithsesi do të konsultohen me juristë, duke mos e fshehur skeptizmin mbi vendimin e keshillit. /Opinion.al
*Bashkengjitur lajmit, vendimet e Keshillit bashkiak ku pika 5 ka te beje me parkun Rinia dhe pika 7 me zhvillimin e pronave të bashkise nga sipermarresit privat
