Kompania amerikane e prodhimit të avionëve “Boeing” ka ngritur pikëpyetje të reja lidhur me sigurinë e tyre pasi avioni i kompanisë, Ethiopian Airlines është rrëzuar të dielën, duke lënë të vdekur 157 persona në bord.
Ky aksident ka shënuar tragjedinë e dytë ajrore në më pak se gjashtë muaj, në të cilin është përfshirë kjo kompani. Në muajin tetor të vitit të kaluar, një avion i njëjtë ra në oqean, duke lënë të vdekur 189 persona. Në përgjigje të këtij incidenti dhe deri në sqarimin e plotë të situatës linjat ajrore të Etiopisë dhe Kinës kanë hequr dorë nga të gjithë aeroplanët Boeing 737 MAX 8.
Ekspertët, në anën tjetër, kanë thënë se është ende shumë herët për të kuptuar se çfarë ka shkaktuar këtë incident. Kompania, Ethiopian Airlines ka thënë se fluturimi ET302, ka zgjatur vetëm gjashtë minuta, para se të rrëzohej në Addis Ababa.
“Në këtë moment, ne nuk mund të sqarojmë asgjë”, ka thënë drejtori i kompanisë, Ethiopian Airlines, Tewolde Gebremariam.
Sipas kompanisë, kapiteni, Yared Getachew, ka realizuar “performancë të mirë” me më shumë se 8.000 orë fluturime. Ndërsa në bord ka pasur pasagjerë nga më shumë se 30 shtete, duke përfshirë banorë të Kenias, kanadezë, amerikanë, britanikë, gjermanë, rusë dhe një serb.
Deputeti sllovak, Anton Hrnko ka konfirmuar përmes një postimi në Facebook, se gruaja dhe dy fëmijët e tij kanë qenë në aeroplan. Ndërkohë një grek ka thënë se ai kishte planifikuar të udhëtonte me atë fluturim mirëpo ka arritur me dy minuta vonesë. Përmes një postimi në Facebook, Antonis Mavropoulos ka shpërndarë një fotografi të biletës, duke shkruar se e diela ka qenë “dita e tij me fat”. Autoritetet në Etiopi e kanë shpallur të hënën ditë zie kombëtare./Opinion.al
