Greqia po vijon luftën me zjarret, që u morën jetën dy personave dhe detyruan shumë të tjerë të evakuoheshin.
Situta është përkeqësuar në pjesën verilindore të Greqisë, ishujt Evia dhe Kythnos, si dhe rajonin e Beoetia në veri të Athinës, ku zjarret kanë marrë përmasa të pakontrollueshme.
Shkak i përhapjes së shpejtë të flakëve janë erërat e forta dhe temperaturat deri në 41 gradë Celsius.
“Ka nëntë fronte aktive… situata është e ngjashme me atë gjatë korrikut”, tha një zëdhënëse e departamentit të zjarrit për agjencinë e lajmeve AFP, duke iu referuar zjarreve që lanë pesë persona të vdekur gjatë korrikut.
Në orët e vona të mbrëmjes së 21 gushtit u vendos që banorët e zonave të rrezikuara të evakuoheshin në spitalin e Alexandroupolis, një qytet në verilindje të Greqisë ku zjarret po vazhdojnë për të katërtën ditë radhazi.
Roja bregdetare tha se kishte zhvendosur 65 pacientë në një traget në portin e qytetit.
Në ishullin Evia, pranë kryeqytetit grek, zyrtarët evakuuan banorët në qytetin industrial Nea Artaki, ku zjarri dëmtoi fermat e shpendëve dhe derrit.
Flakët kërcënuan edhe parkun kombëtar Dadia, ku u gjet trupi i një burri që besohet se ishte një emigrant pa dokumente. Një bari i moshuar gjithashtu u gjet i vdekur në rajonin e Boeotia më herët më 21 gusht.
Dadia është një nga zonat më të rëndësishme të mbrojtura në Evropë, pasi ofron një habitat ideal për zogjtë e rrallë dhe është shtëpia e të vetmes popullsi shumuese të shkabave të zeza në Ballkan.
Bashkimi Evropian njoftoi se do të dislokonte dy avionë zjarrfikës nga Qipro dhe një ekip zjarrfikës rumun nëpërmjet mekanizmit të mbrojtjes civile të bllokut evropian.
Kjo është vala e dytë vdekjeprurëse e zjarreve masive brenda vetëm një muaji nëvendin fqinj./Opinion.al
