“Në janar do të ndodhë diçka, ndaj kujdes…”, pat premtuar pak ditë para Krishtlindjeve sulmuesi italian Antonio Cassano, që ka përfunduar jashtë skuadrës së Sampdorias pas polemikave që pati me presidentin Ferrero. Sulmuesi nga Bari nuk ka luajtur asnjë minutë këtë sezon, ka refuzuar oferta të shumta për të luajtur me skuadra të tjera të Serisë A, por së fundi në derën e tij kanë ardhur dy oferta të mira nga Kina e Largët. Kampionati që po rrëmben shumë yje të futbollit i ka bërë një ofertë edhe fantazistit italian, që p oi merr në konsdideratë para se të vendosë për të ardhmen. Lajmin e ka konfirmuar për “Sport Mediaset” menaxheri Beppe Bozzo, që ka thënë se po përpiqet të bindë sulmuesin të pranojë ofertën kineze.
Madje jo një, por dy oferta të mira në adresë të një prej fantazistëve më të mirë në botë, që me topin mund të bëjë magjira edhe pse tashmë 34 vjeç. Cassano ka thënë se në janar do të ketë të reja në lidhje me të ardhmen e tij, por deri më tani asnjë lajm nuk ka ardhur. Entella, ekipi i një qyteze pranë Xhenoas dhe Palermo kanë qenë dy skuadrat italiane që e kanë kërkuar sulmuesin, por duket se ai nuk dëshiron të largohet nga qyteti bregdetar. Por ndoshta milionat që vijnë nga Kina mund ta bindin të largohet. “Në Kinë e duan me çdo kusht, teksa kanë mbërritur oferta konkrete. Tashmë gjithçka është në duart e Cassano, që duhet të zgjedhë, pasi nuk ka më kohë”, tha menaxheri Bozzo. Sulmuesi edhe pse nuk luan prej 6 muajsh, stërvitet çdo ditë me ekipin e të rinjve.
