Dy notarë u sulmuan me sa duket nga peshkaqenë në brigjet e Long Island të martën, një ditë pasi dy të tjerë raportuan se ishin sulmuar teksa po shijonin ujin në plazhet e njohura të Nju Jorkut.
Të paktën një plazh vonoi hapjen për argëtuesit të martën, pasi zyrtarët thanë se dronët vunë re rreth 50 peshkaqenë rëre atë mëngjes pranë një parku të njohur plazhi. Kur plazhi u rihap, notarët u këshilluan të qëndronin afër bregut.
“Ne duam të sigurohemi që notarët të jenë të sigurt,” tha për Newsday Drejtori Rajonal i Parkut Shtetëror të Long Island, George Gorman.
Plazhi u mbyll edhe një herë pas një shikimi të mundshëm pwr peshkaqenw, por zyrtarët përcaktuan se ishte një delfin.
Pas një sërë sulmesh vitin e kaluar, zyrtarët e parqeve shtetërore kanë shtuar patrullimet dhe kanë vendosur më shumë drone për të vëzhguar ujërat për rrezik të mundshëm.
“Ne patëm një sezon vitin e kaluar ku kishim gjashtë notarë të kafshuar nga peshkaqenët, kështu që kjo është kthyer në një shqetësim,” tha për WABC Komisioneri i Policisë së Qarkut Suffolk, Rodney Harrison.
Incidentet e së martës ndodhën rreth 60 milje (95 kilometra) larg njëra-tjetrës, duke përfshirë një nga Fire Island Pines – jo shumë larg nga një sulm tjetër një ditë më parë, kur një 15-vjeçar raportoi se ishte kafshuar në njërën nga këmbët e tij nga një peshkaqen ndërsa bënte sërf./Opinion.al
