Në mesin e qindra personave të plagosur nga zjarret në Greqi, ka edhe shqiptarë. Lajmi konfirmohet nga Ambasada e vendit tonë në Athinë. Me anë të një postimi në rrjete sociale gjatë orëve të mbrëmjes, Ambasada Shqiptare thotë se të lënduar kanë mbetur 2 fëmijë të moshës 10 dhe 13 vjeç, të cilët fatmirëisht janë jashtë rrezikut për jetën. E plagosur ka mbetur gjithashtu edhe një qytetare shqiptare, e cila ndodhet në spital.
“Ambasada e Republikës së Shqipërisë në Athinë njofton se pas verifikimeve të kryera në terren në të gjitha spitalet në zonën e Athinës, si dhe nga burimet zyrtare të Emergjencave Civile, rezulton se përveç rastit të qytetares shqiptare në spitalin Evangelismos për të cilën kemi njoftuar, janë dhe dy fëmijë nga e njëjta familje, të moshës 10 dhe 13 vjeç nga Fieri, të shtruar në spitalin pediatrik Agia Sofia, në gjendje të mirë shëndetësore. Ditët në vijim pritet një konfirmim zyrtar nga autoritetet greke për identifikimin e viktimave të kësaj tragjedie. Ambasada është në ndjekje të situatës duke komunikuar në vijëmësi me autoritetet kompetente”, thuhet në njoftimin e ambasadës.
Ndërkohë ABC News ka mësuar se fëmijët janë shpëtuar nga zonja greke e shtëpisë ku punonte nëna e tyre. Ajo i ka mbajtur 4 orë në breg të detit, deri në mbërritjen e varkës së shpëtimit. Të vegjlit janë të traumatizuar, por në gjendje të mirë shëndetësore e pritet të lenë nesër spitalin.
Sa i përket gruas, ajo mësohet se është një 63-vjeçare nga Berati me inicialet B.XH, e cila ndodhet jashtë rrezikut për jetën.
Në një postim më të hershëm, Ambasada njoftonte se deri më tani fatmirësisht nuk ka viktima nga komuniteti shqiptarë.
“Ambasada e RSh-së në Athinë njofton se pas komunikimeve me autoritetet greke, deri më tani nuk janë identifikuar viktima nga komuniteti shqiptar. Ndërkohë, në spitalin Evangelismos ndodhet i shtruar një shtetas shqiptar. Ambasada është në ndjekje të situatës duke komunikuar në vijimësi me autoritetet kompetente”.
