Shqipëria nuk është më një perlë e fshehur, pasi në vitin 2024, më shumë se 11.7 milionë turistë të huaj vizituan vendin e vogël ballkanik dhe pritshmëritë janë që ky numër të rritet në 15 milionë deri në fund të këtij viti, një shifër gati katër herë më e madhe se popullsia e vendit.
Kështu nis reportazhi i medias gjermane prestigjioze “DW” për vendin tonë, i cili është kthyer në një destinacion turistik për vizitorë nga vende të ndryshme të botës.
Turistët u shprehën për median gjermane se Shqipëria është një vend i mrekullueshëm për pushime nga Veriu në Jug.
“Shqipëria ofron larmishmëri, pasi ka ushqime të shijshme, plazhe të bukura dhe male të mrekullueshme. Ajo që më ka pëlqyer është natyra perfekte për hiking. Këtu kam 6 ditë edhe pse janë të pamjaftueshme, por padiskutim do të kthehem sërish.”
“Njerëz të mrekullueshëm dhe miqësorë, klima e shkëlqyer. Mendoj se Shqipëria ka mjaft potencial për tu bërë një shtet me turizëm madhështor. Kam 6 fëmijë dhe do të na pëlqente që herën tjetër të vinim me gjithë fëmijët këtu.”
“Kjo është hera e parë në Shqipëri. Eksperienca këtu është shumë e mirë, moti i bukur, njerëz të mrekullueshëm, ushqimi gjithashtu, gjithçka fantastike.”
“DW” thekson në reportazhin për vendin tonë se për të konkurruar në një rajon të dominuar nga lojtarë të mëdhenj të turizmit, të vendosur prej kohësh, si Greqia dhe Kroacia, Shqipëria ka nevojë për më shumë sesa vetëm çmime të ulëta dhe plazhe piktoreske.
Kjo është arsyeja pse disa hotele po provojnë një qasje të re: ofrimin e përvojave kulturore si vallet popullore dhe degustimet e ushqimit vendas për të krijuar një lidhje më të thellë mes turistëve dhe kulturës vendase.
Jo vetëm mediat ndërkombëtare i kanë bërë jehonë atraksioneve turistike të Shqipërisë, por edhe në rrjetet sociale ka nisur një trend i ri me postime video nën sloganin “Albania is calling”, Shqipëria po na thërret.
Shumë të rinj nga vende të ndryshme të botës reklamojne vendin tonë si një destinacion ideal për tu vizituar.
Mbi të gjitha të huajt nëpërmjet videove ndajnë përvojat e tyre pozitive nga udhëtimet në Shqipëri duke ndihmuar njëkohësisht në rritjen e ndjeshme të profilit të Shqipërisë si destinacion turistik në rrjetet sociale./tvklan
