Një sasi prej 6.5 kg marijuanë është sekuestruar nga policia kufitare në portin e Durrësit, destinacioni i së cilës ishte Italia.
Në pranga ka përfunduar drejtuesi i mjetit, shtetasi Fatbardh Kokomeci, 54 vjeç, banues në Tiranë.
“Gjatë kontrollit të ushtruar në Pikën e Kalimit Kufitar Port Durrës, në mjetin autobus, me drejtues shtetasin F.Kokomeci, pas një analize risku të hollësishme dhe verifikimeve të tjera speciale nga Specialistët e vijës së dytë të Kontrollit në pjesën e pasme, pas sedileve të fundit u gjet lëndë narkotike Marijuanë”, sqaron policia.
Sipas deklaratës, droga ishte e ndarë në 5 pako.
Specialistët dhe grupi hetimor vijojnë punën për kapjen e personave të tjerë të implikuar në këtë rrjet kriminal. Materialet i kaluan Prokurorisë pranë Krimeve të Rënda Tiranë për veprime të mëtejshme për veprën penale “Trafikimi I lëndëve narkotike” e mbetur në tentativë.
