Ditën e sotme një atentat mafioz iu bë prokurorit Arjan Ndoj, teksa ishte duke udhëtuar me makinë në vendin e quajtur në “Mbikalimin e Shkozetit” në Durrës.
Nga të shtënat me armë, kanë mbetur të plagosur dhe dy persona të tjerë, të cilët janë transportuar për në spital.
Mësohet se prokurori ka marrë dy plumba dhe i është nënshtruar një ndërhyrje kirurgjikale, por nuk dihen më shumë detaje për gjendjen shëndetësore të tij.
Ndërkohë, policia njofton se ngjarja e rëndë ka ndodhur rreth orë 16:30, ku persona ende të pa indetifikuar kanë qëlluar me armë drejt një mjetit me të cilin udhëtonte Ndoj.
Sipas policisë, të plagosuri janë A.L., 48 vjeç, A.N., 44 vjeç dhe A.M., 30 vjeç, ndërsa ky i fundit është transportuar për në spitalin e Traumës në Tiranë për mjekim më të specializuar. Autoritet kanë blinduar zonën si dhe kanë ngritur pika kontrolli për kapjen e autorëve.
Gjithashtu, Policia e Shtetit fton këdo që mund të ofrojë informacion në ndihmë të hetimit të shpejtë të ngjarjes të telefonojë falas në numrin 112.
Njoftimi i policisë
Ne aksin rrugor Durrës – Tiranë në afërsi të mbikalimit të Shkozetit, rreth orës 16:30, në afërsi të vendit të quajtur “Mbikalimi i Shkozetit” kanë qëlluar me armë zjarri në drejtim të mjetit me targa AA 333 ZD, e për pasojë janë plagosur shtetasit A.L., 48 vjeç, A.N., 44 vjeç dhe A.M., 30 vjeç. Shtetasi A.M. është nisur për mjekim të specializuar në Spitalin e Traumës në Tiranë, ndërsa dy shtetasit e tjerë ndodhen në Spitalin Rajonal Durrës, jashtë rrezikut për jetën.Policia e Durrësit është vënë në ndjekje të autorëve, po krihet zona dhe në të gjitha akset rrugore që lidhen me Durrësin janë ngritur pika kontrolli. Për zbardhjen e ngjarjes është ngritur menjëherë një grup i posaçëm hetimor nga Departamenti i Policisë Kriminale, Prokuroria e Rrethit Gjyqësor Durrës dhe Drejtoria Vendore e Policisë Durrës. Policia e Shtetit fton këdo që mund të ofrojë informacion në ndihmë të hetimit të shpejtë të ngjarjes të telefonojë falas në numrin 112./Opinion.al
