Presidenti i Federatës Shqiptare të Futbollit dhe nënkryetari i UEFA-s, Armand Duka , ka dhënë një intervistë ditën e sotme për “Sky Sport”.
Mes sfidave të Euro 2024 padyshim më e ndjera për Shqipërinë është përballja me Italinë, ku Armand Duka u shpreh se e pret me shumë emocion këtë sfidë ashtu si të gjithë shqiptarët.
Armand Duka: Në Dortmund do të luhet ndeshja më e rëndësishme, ndeshja e jetës për ne. Italia ka një ekip me histori, kampion që fuqi, me shumë cilësi, por lojtarët tanë janë të përgatitur mirë. Në stadium presim një ‘mur të kuq’, mendoj se më shumë se gjysma e tifozëve në stadium do të jenë shqiptarë, është një nga ndeshjet e grupeve me më shumë kërkesa për bileta, e dyta pas Gjermani-Zvicër.
Duka kërkon që Kombëtarja të mos vuajë presionin përballë kundërshtarëve me përvojë në të tilë aktivitete.
Armand Duka: Shpresoj që lojtarët tanë t’i përdorin këto ndeshje për të treguar më të mirën e tyre, pa presion. Nëse ia dalim të kualifikohemi do të jemi shumë të lumtur, por do të jemi të lumtur edhe nëse nuk ia dalim.
Shqipëria ka në grupin e Euro 2024 edhe Spanjën dhe Kroacinë.
