Policia ka arrestuar një 36-vjeçar në Vaun e Dejës, i cili akuzohet për kultivim të lëndëve narkotike. Mësohet se policia ka gjetur të mbjella në një arë me misër edhe 462 rrënjë kanabis sativa, të cilat janë vërejtur pas kontrolleve të zonës me dron.
Në pranga është vënë edhe një 50-vjeçar, të cilit është gjetur një armë zjarri e fshehur në një magazinë pranë banesës së 36-vjeçarit.
“Arrestohet një 36-vjeçar, pasi kishte kultivuar 462 bimë narkotike, në pronën e tij, në fshatin Hajmel. Procedohet në gjendje të lirë kryeplaku i këtij fshati, për shpërdorim detyre.
Në pranga dhe një 50-vjeçar, sepse gjatë kontrollit në magazinën e tij, ngjitur me pronën e 36-vjeçarit, u gjet 1 armë zjarri automatik me municion luftarak.
Në vijim të megaoperacioneve kombëtare të koduara “Territor i pastër” dhe “Sundimi i ligjit”, shërbimet e Komisariatit të Policisë Vau i Dejës, në bashkëpunim me shërbimet e Forcës së Posaçme “Shqiponja”, duke përdorur dronë për monitorim ajror, kanë konstatuar se në mes të një parcele me misër në fshatin Hajmel, ishin kultivuar 462 bimë kanabisi.
Shërbimet e Policisë kanë organizuar punën dhe kanë bërë të mundur kapjen dhe arrestimin në flagrancë të shtetasit P. Rr., 36 vjeç, banues në fshatin Hajmel, i cili po kujdesej për bimët narkotike, të cilat u asgjësuan nëpërmjet djegies.
Për këtë rast, u referuan materialet në Prokurori ku nisi procedimi në gjendje të lirë për kryeplakun e fshatit Hajmel, shtetasin F. K., 69 vjeç, për veprën penale “Shpërdorimi i detyrës”.
Në vijim të veprimeve për këtë rast, u arrestua në flagrancë edhe shtetasi M. N., 50 vjeç, pasi gjatë kontrollit në magazinën e tij, ngjitur me pronën e 36-vjeçarit, u gjet 1 armë zjarri automatik me krehër me municion luftarak, të cilat u sekuestruan në cilësinë e provës materiale”.
