Një javë pas operacionit ndërkombëtar të nisur nga policia greke dhe DEA amerikane, në bashkëpunim me Europol, kanë dalë emra të tjerë të shqiptarëve, të përfshirë në organizatën më të madhe të trafikut të lëndëve narkotike.
Dy vëllezërit shqiptarë që janë arrestuar në Bruksel janë Dhimitër dhe Xhevahir Poti. Ata janë arrestuar të hënën, ndërsa ditën e martë gjykata i ka lënë burg për përfshirje në një organizatë kriminale dhe posedim të narkotikëve.
Sipas hetimeve të policisë greke ata ishin përgjegjës për shpërndarjen e kokainës në vendet e Evropës, ndërsa baza e tyre ishte Belgjika. Gjatë arrestimit të dy vëllezërve shqiptarë janë sekuestruar: 100 kg hashash, 19,000 euro, dhe tre makina.
Ndërkohë nga autoritetet shqiptare kanë nisur gjuetinë për Klemend Balilin, i shumëpërfoluri i ditëve të fundit si “koka” e rrjetit ndërkombëtar të trafikut të lëndëve narkotike.
Gjatë ditës së premte, Policia e Sarandës ka zhvilluar disa tentativa për ta ndaluar, por nuk ka mundur ta gjejë ish – kreun e Transporteve të këtij qyteti.
Burime në Policinë e Shtetit thanë se janë ushtruar disa kontrolle në banesat e tij në Sarandë dhe në Delvinë, por që rezultuan të pasuksesshme. Ai nuk ndodhej në asnjë prej tyre dhe as në ambientet e bizneseve të tij./tvklan.al
