76 vjet burg kërkoi Prokuroria e Krimeve të Rënda për 7 pjesëtarët e rrjetit të trafikut të drogës nga laguna e Vilunit në Shkodër drejt Italisë.
Prokurori Behar Dibra, lexoj pretencën para Gjykatës së Krimeve të Rënda, duke i kërkuar që 7 të pandehurit të shpallen fajtor për akuzën e “trafikut të drogës” në bashkëpunim, pasi tentuan të dërgojnë me skaf në itali 780 kg hashash.
Për të pandehurin Mikel Hoxha prokurori kërkoi dënimin me 16 vjet burg, pasi dyshohet se është njëri nga organizatorët e këtij rrjeti, së bashku me personin e shpallur në kërkim Bardhok Pllanaj.
Ky i fundit, nuk u arrestua nga policia, pasi ishte fshehur në mjetin e deputetit Mark Frroku, i cili nuk lejoi kontrollin e makinës.
Në vazhdim të leximit të konkluzioneve, prokurori kërkoi nga gjykata dënimin me nga 14 vjet burg për të pandehurit Indrit Raja dhe Ervis Sulo të dyshuar me cilësinë e personave që kanë siguruar mallin dhe kanë gjetur skafistin. Për të pandehurit Kristjan Çokaj e Alfred Syli dhe skafistin Leonidha Dhimojani prokurori kërkoi dënimin e tyre me nga 10 vjet burg.
Të tre këta të pandehur, sipas akuzës, janë marr me paketimin dhe transportin e drogës. Ndërsa për të pandehurin Mirjan Vitaj prokurori kërkoi dënimin e tij me 12 vjet heqje lirie, me dyshimin se është një nga bashkëpunëtorët e afërt me organizatorët e këtij rrjeti.
Të pandehurit, nëse deklarohen fajtor përfitojnë uljen e 1/3 së dënimit, për shkak se kanë pranuar shqyrtimin e dosjes në aplikim të gjykimit të shkurtuar.
Pas leximit të pretencës, avokatët kërkuan kohë që të pregatiten, kohë të cilën gjykata ia dha për dy javë, duke ndërprerë dhe shtyrë seancën gjyqësore.
Sipas akuzës, 7 të pandehurit në bashkëpunim me persona të tjerë që ende nuk janë arrestuar janë pjesë e një rrjeti të trafikut të drogës nga Shkodra drejt Malit të Zi dhe më pas Italisë.
Edhe ditën e operacionit të arrestimit të tyre, më 30 shtator 2014 të pandehurit kishin ngarkuar me 780 kg hjashash në skafin që u nis nga laguna e Vilunit dhe më pas u ndalua në Mal të Zi pasi u njoftuan autoritet malazes.
