Petrit Koshaj u shkarkua dje nga posti i Drejtorit të Policisë së Burgjeve. Motivacioni i ministrisë së Drejtësisë ishte “për shkelje të rënda gjatë ushtrimit të detyrës”.
Po për çfarë bëhet fjalë?
Burime konfidenciale sqaruan se gati dy javë më parë, një institucion ligjzbatues i ka kërkuar ministrit të Drejtësisë pezullimin e Koshajt nga detyra e tij në Drejtorinë e Përgjithshme të Burgjeve, shkruan Panorama.
Koshaj akuzohet se ka lejuar që Emiljano Shullazi të kurohej në një spital privat, pa njoftuar prokuroren e çështjes.
Shkarkimi i Koshajt është largimi i tretë i një zyrtari të lartë nga funksioni në Drejtorinë e Përgjithshme të Burgjeve në një hark kohor prej 1 viti. Pas arrestimit të ish-zv. drejtorit të Përgjithshëm të Burgjeve, Iliaz Labi, për akuzën e “korrupsionit” u lirua nga detyra edhe ish-drejtori i Përgjithshëm, Artur Zoto.
