Drejtori i Policisë Kriminale, Tonin Vocaj ka kaluar vettingun duke u konfirmuar në detyrë. Në verifikimet e kryera në tre komponentët e vlerësimit të pasurisë, pastërtisë së figurës dhe profesionalizmit, Vocaj rezultoi i pastër.
Komisioni i Jashtëm i Vlerësimit e pyeti Vocajn edhe për foton e publikuar në media në 2013 me Arben Frrokun, i dënuar për vrasjen e kryekomisarit Dritan Lamaj.
Sipas Vocajt ai është njohur me Frrokun në vitin 2006 kur ndiqnin studimet në Universitetin “Kristal”. Fotot janë publikuar në faqen e tij në Facebook muaj para se të kryhej vrasja e komisar Dritan Lamajt.
Sipas Vocajt nuk ka pasur dijeni se mes Frrokut dhe Lamajt ka pasur ndonjë konflikt. Sipas Vocajt, ai ka shkuar i pari në vendngjarje, madje ka qenë ai që ka bërë të mundur identifikimin dhe më pas arrestimin e Frrokut./ Opinion.al
