Kanë mbetur edhe dy javë nga “deadline” për votimin e reformës në drejtësi. Duket se PD po lëviz, në drejtim të gjetjes së një zgjidhje. Është bërë një propozim i ri për mazhorancën, tha sot lideri Basha. Por, nëse konsensusi nuk arrihet deri më 21 korrik, çfarë do të ndodhë? A do ti bashkohen deputetët e djathtë votimit të reformës, përkundër vullnetit të grupit parlamentar? Për këtë kemi pyetur disa prej eksponentëve të PD, nga ata deputetë që nuk kanë kursyer as kritikat ndaj Bashës.
Majlinda Bregu, e pyetur nga Opinion.al nëse do ta votojë reformën në drejtësi më 21 korrik edhe pa PD-në, u shpreh se “sot ka një propozim të ri të bërë në grupin e PD-së”. Bëhet fjalë për një propozim që i ka shkuar mazhorancës lidhur me vetingun në organet e drejtësisë, nen që ka mbajtur deri më sot të ndara palët.
“Unë jam për një reformë të drejtë në drejtësi që të mos forcojë pushtetin e asnjë Kryeministri. Besoj se deri në fund do të gjendet kompromisi”, u shpreh znj. Bregu. Ajo la të kuptohet se mbështet reformën, por nuk pranoi të fliste për votim individual.
Sakaq ne kemi pyetur edhe deputetin Astrit Veliaj. Ai u shpreh për Opinion.al se “partnerët ndërkombëtarë duhet ta inkurajojnë dhe lehtesojnë arritjen e kompromisit”. Deputeti demokrat u shpreh kundër blerjes dhe shantazhimit të deputetëve, duke lënë të kuptohet se nuk do të votojë jashtë grupit të PD. “Ne na duhet nje mazhoritet i gjere për të kaluar reformen dhe ndryshuar Kushtetuten, dhe kjo nuk duhet te arrihet permes blerjes dhe shantazhimit te deputeteve”, tha ai, ndërsa shtoi se “inkurajoj gjetjen e konsensusit te gjere politik dhe nje vote unanime ne parlament”.
Opinion.al u perpoq të merrte një prononcim edhe nga deputeti tjetër i PD, Eduard Selami, por ishte e pamundur. Ai nuk iu përgjigj pyetjes sonë mbi reformën në drejtësi dhe votën e tij më 21 korrik. Selami, është nga ata deputetë që ka kundërshtuar disa herë vendimet e grupit demokrat. Gjithashtu ai u përfol edhe për një takim me ambasadorin amerikan Donald Lu dhe marrëveshjet që po luhen “underground” për votimin e reformës nga disa deputetë të PD, në kundërshtim me vendimet e partisë.
/Riviera Dedaj-Opinion.al
