Ekspertët e Partisë Demokratike munguan në tryezën e diskutimeve të draftit për reformën në drejtësi, që u mblodh paradite në ambientet e Kryesisë së Kuvendit.
Pas mungesës së opozitës, tryeza e ekspertëve u shty për në orën 15.00. Por ekspertët nuk u paraqiten dhe konfirmuan se nuk do të behën pjesë e tryezës.
Një ditë më parë, Enkelejd Albeaj akuzoi mazhorancën se po kërkon kapjen e sistemit të drejtësisë. Si shembull të mosreflektimit ndaj rekomandimeve të Komisionit të Venecias, eksperti demokrat solli vendimarrjen me 84 vota në parlament, për zgjedhjen e funksionarëve të lartë në sistemin e drejtësisë.
Sipas opozitës formula me 3/5 që është atakuar edhe nga Komisioni i Venecias, cimenton kapjen politike të sistemit të drejtësisë.
Për këtë arsye, dalja nga ngërçi sipas opozitës, duhet të tejkalojë tryezën e eskpertëve dhe të bazohet mbi një kompromis politik, në të kundërt tryeza e ekspertëve është thjesht kozmetikë.
Ideja e një tryezë politike gjeti edhe mbështetjen e LSI-së. Ministri i Drejtësisë Ylli Manjani, një ditë më parë artikuloi se e ka ardhur koha që fjala t’i kalojë tryezës politike, pasi reforma në drejtësi kërkon një konsensus mes palëve dhe duhet të jetë gjithpërfshirëse. /tvklan/
