Edhe pse opozita thotë se ka 17 ditë që është tërhequr nga vendet e rezervuara duke propozuar një tjetër variant për gjetjen e konsensusit për reformën në drejtësi, anëtarët socialistë të Komisionit të Posaçëm deklarojnë se vetëm sot janë vënë në dijeni, por ende nuk e kanë të qartë propozimin.
Vasilika Hysi: Opozita u bë kohë që na vjen me propozime të ndryshme, del nga një propozim tek një tjetër. Nëse opozita është tërhequr nga vendet e rezervuara, OK, ishte një kërkesë absurde që binte ndesh me Komisionin e Venecias, por për variantet e tjera, unë pa i lexuar nuk mund të prononcohem.
Mazhoranca kërkon që negociatat për reformën të bëhen në kanalet e përcaktuara më parë.
Vasilika Hysi: Nuk di ndonjë nismë të Partisë Demokratike, madje do të thosha që ndihem keq që kolegët e opozitës, ndërkohë që ka negociata dalin me paketa që janë jashtë pjesës së negociatave. Unë besoj dhe mendoj që i gjithë procesi i negociatave nuk duhet të jetë negocim jashtë strukturave që duhet negociuar.
Mazhoranca në komisionin e reformës thotë se ndryshimet kushtetuese që po diskutohen, pa praninë e opozitës, do ti dërgohen më 21 korrik seancës plenare për votim. /TV KLAN
