Hetimet për vrasjen e Artan Cukut aktualisht janë orientuar drejt një personi me precdentë që ka qenë arrestuar në Vlorë në kohën kur Cuku ishte drejtor policie. Rreth një muaj pas krimit, grupi hetimor që po merret me çështjen, ka marrë një telefonatë, e cila identifikonte personin e shfaqur në videon e regjistruar pranë vendit ku u vra ish drejtori i Policisë së Vlorës.
Policia nisi verifikimin dhe rezultoi se mes emrit të dhënë nga telefonuesi dhe personit në video kishte një përputhje të madhe fizike. Nisur nga kjo e dhënë, policia i kanalizoi hetimet në këtë drejtim. Autori i dyshuar rezulton të jetë një person me precedent penalë dhe ka qenë i arrestuar në Vlorë në periudhën kur Cuku mbante detyrën e Drejtorit të policisë së këtij qarku, raporton BW.
I njëjti person ka qenë i përfshirë në një ngjarje kriminale pak kohë më parë dhe për këtë arsye policia ka marrë AND-në e të dyshuarit, për ta krahasuar me atë që u gjet nga provat biologjike në hollin e pallatit ku u vra Artan Cuku. Rezultatet e këtij krahasimi do të përcaktojnë vijimin e hetimeve në këtë pistë, shkruan Balkanweb.
