Rreth 4 muaj pas vrasjes së biznesmenit, Bujar Nasufi në rrugën “Myrteza Zeneli” në kryeqytet, Policia e Tiranës ka në duar profilin e ADN-së së autorit.
Kjo provë me tepër vlerë për hetuesit është përftuar në një dorezë gjysmë të djegur që dyshohet se i përket vrasësit, e sekuestruar në Kodrat e Sharrës, pikërisht në vendin ku u gjet i shkrumbuar motori i përdorur në krim.
Profili i përftuar është dërguar për krahasim pranë Interpol, me qëllim për të kuptuar nëse ai ka përputhshmëri me ADN-në e ndonjë personi të skeduar më herët nga autoritetet shqiptare, por jo vetëm.
Bujar Nasufi u ekzekutua mbrëmjen e 12 Janarit në Tiranë. Ai u qëllua me breshëri automatiku sapo mbërriti në vendparkimin pak metra larg banesës së tij.
56-vjeçari ishte biznesmen në fushën e mobilerisë. Ai nuk rezultonte person me precedent penal, por pavarësisht kësaj policia po punon në disa pista për zbardhjen e ngjarjes.
Burime pranë grupit të hetimit bëjnë me dije se ngjarja ka dyshime të ketë ardhur si pasojë e ndonjë konflikti që viktima ka patur në të shkuarën.
Konkretisht bëhet fjalë për konflikte që lidhen me motive pronësie.
Tv Klan
