Çdo person, reputacioni i të cilit është cënuar drejtpërdrejt nga publikimi i fakteve dhe informacioneve të pavërteta dhe/ose të pasakta prej Portaleve, ka të drejtën e përgjigjes.
Personi, që ka të drejtën e përgjigjes, duhet të paraqesë një kërkesë me shkrim, drejtuar Portalit duke parashtruar arsyet dhe faktet që mbështetin kërkesën e tij.
Kërkesa për të drejtën e përgjigjes duhet të paraqitet tek Portali, brenda 10 (dhjetë) ditëve nga publikimi i fakteve dhe informacioneve që pretendohen të pavërteta dhe/ose të pasakta.
Brenda 48 orëve nga marrja e kërkesës, Portali vendos për ushtrimin ose refuzimin e së drejtës së përgjigjes dhe për këtë njofton me shkrim kërkuesin.
Portali, nëse vendos për ushtrimin e së drejtës, publikon përgjigjen e çdo personi që është cënuar/përmendur nga publikimi, pa kosto financiare për personin e cënuar/përmendur. Përgjigjja duhet të publikohet e plotë, e dukshme dhe në të njëtën faqe ku është publikuar materiali që kontestohet.
Nëse kërkuesi nuk merr një përgjigje brenda afatit të përcaktuar në pikën 3, të këtij neni, prezumohet se Portali ka refuzuar kërkesën.
I prekuri pas refuzimit të Përgjigjes I drejtohet Këshillit të Ankesave
Këshilli i Ankesave, brenda 72 orësh nga paraqitja e një ankese për refuzimin e së drejtës së përgjigjes nga Portali, shqyrton çështjen dhe, nëse e gjen të drejtë ankesën e bërë, i kërkon Portalit, korrigjimin e fakteve dhe informacioneve, në lidhje me personin e interesuar, në një mënyrë të ngjashme dhe kohë të njëjtë me atë të publikimit, objekt ankese, brenda 48 orëve nga marrja e njoftimit.
Pikëpyetje:
· Kush e ngre Këshillin e Ankesave
· Si e gjykon KA nëse ka të drejtë ankuesi apo Portali?
Në raste të shkeljeve të kryera nga ana e Portaleve, AMA dhe Këshilli i ankesave vendosin:
a) detyrimin e Portalit:
i. për të publikuar formulën e korrigjimit sipas formës dhe përmbajtjes së parashikuar në nenin 53/1 të këtij ligji;
ii. për të kërkuar nëpërmjet AKEP-it vendosjen e një njoftimi të karakterizuar teknikisht si “pop up”;
b) gjobë, shuma e së cilës përcaktohet në përputhje me parashikimet e këtij ligji dhe të akteve nënligjore të tij;
c) pezullim të përkohshëm të licencës dhe/ose autorizimit;
ç) uljen e kohëzgjatjes së vlefshmërisë së licencës dhe/ose autorizimit;
d) heqje të licencës dhe/ose autorizimit.
A vendos dot POP UP AKEP?
* Për shkelje të kryera nga Portalet AMA, I kërkon (AKEP):
a) të urdhërojë heqjen e përmbajtjes së caktuar menjëherë, por jo më vonë se 60 minuta nga njoftimi në rastet kur shërbimet e medias elektronike dyshohet se mund të nxisin kryerjen e një nga veprave penale në vijim:
i. pornografi me fëmijë;
ii. inkurajimin e akteve terroriste;
iii. shkelje të sigurisë kombëtare.
Në rast të moszbatimit të urdhrit brenda afatit të përcaktuar, të bllokojë aksesin në internet.
b) të vendosë një njoftim “pop up” në faqen e internetit/domain-in e portalit i cili përmban informacion mbi vendimet e organeve vendimmarrëse të AMA-s.
· Në rast gjobe, Ankimi ndaj vendimit të KA-së nuk pezullon ekzekutimin e vendimit. Bordi i AMA-s shqyrton ankesën dhe shpall vendimin jo më vonë se 10 ditë. Kundër vendimit të Bordit të AMA-s mund të bëhet ankim në Gjykatën e Administrative të Shkallës së Parë Tiranë.
Kontestimet
Organizata të mediave, gazetarë dhe aktivistë të shoqërisë civile e kanë cilësuar projektligjin si kufizim për hapësirën e së vërtetës dhe se përmban pika thelbësore që cenojnë lirinë e medias.
· Autoriteti i Mediave Audiovizive (AMA), nuk duhet të zëvendësojë organet e pavarura gjyqësore ose mekanizmat vetërregullues të efektshëm për çështjet e lirisë së shprehjes.
· Kompetencat e AMA-s nuk duhet të shtrihen në trajtimin e çështjeve të tilla si shpifja.
· Vlera e lartë e gjobave/ Përgatiti Manjola Bregasi
