Adela Kondakçiu, financierja e Ajola Xoxës ka bashkëpunuar me Prokurorinë e Posaçme (SPAK), duke u bërë kështu e para e penduar grua që bashkëpunon për të zbardhur korrupsionin e zyrtarëve të lartë. E konsideruar si njeriu më i besuar i Xoxës, Kondakçiu është ndërkohë e pandehur në të njëjtën çështje me kryebashkiakun e Tiranës Erion Veliajn dhe bashkëshorten e tij.
“Klan News”, duke iu referuar burimeve nga SPAK raporton se Kondakçi ka zbërthyer skemën e korrupsionit për të cilën akuzohen çifti Veliaj-Xoxa, duke treguar me detaje se si bëhej lëshimi i faturave fiktive dhe trasaksionet për të fshehur origjinën e parave.
Adela Kondakçiu ka dorëzuar në Prokurorin e Posaçme çdo informacion ose të dhëna që ajo ka pasur në dispozicion.
Kondakçiu është marrë e pandehur nga SPAK, por nëse statusi i saj mbetet në fuqi nga gjykata në fund kur të shpallë vendimin, ajo mund të përfitojë ulje të dënimit.
Në total që nga nisja e hetimit deri më tani, SPAK ka marrë rreth 100 dëshmi për çështjen për të cilën akuzohet kryebashkiaku i Tiranës, po ashtu janë sekuestruar kontrata, dokumente, pajisje kompjuterike dhe celulare për të provuar akuzat ndaj të dyshuarve.
30 të pandehur, mes tyre dhe Kodakçiu
Vetëm një ditë më parë, më 23 korrik, Prokuroria e Posaçme mori zyrtarisht të pandehur kryetarin e Bashkisë së Tiranës, Erion Veliaj, për katër akuza: korrupsion pasiv, pastrim parash, fshehje pasurie dhe futje e sendeve te palejuara në institucionet e ekzekutimit të vendimeve penale. E pandehur u mor edhe bashkëshortja e tij, Ajola Xoxa, të cilës iu komunikuan akuzat për: korrupsion, pastrim të parave dhe mosdeklarim të pasurisë, në bashkëpunim me kryebashkiakun.
Të pandehur u morën edhe dy biznesmenët Mirton Lika, për fshehje të të ardhurave dhe Elman Abule për pastrim parash, i cili ndodhet në arrest shtëpie. Akuzë për futje të paligjshme të sendeve në qeli iu komunikua punonjësit të Policisë së Burgjeve, Fatjon Baci, i cili rezulton t’i ketë dhënë telefonin kryebashkiakut në mars të këtij viti për ta përdorur.
Mes të pandehurve janë edhe: financierja Adela Kondakçiu, Ina Goxhaj, Flutur Xhani, Valmir Xoxa, Erald Simixhiu (daja i Ajola Xoxës), Fatmir Bektashi, Meriman Palushi, Shkëlqim Fusha, Gentian Sula, Sokol Kryeziu, Frosina Bollo.
Për dosjen “Veliaj”, prokuroria ka kërkuar zgjatjen e afateve hetimore deri më 29 shtator.
