Futbollistët e Dortmundit ishin shumë të dëshpëruar në përfundim të derbit në fushën e Shalkes, pasi barazimi i la 7 pikë pas. Trajneri Tomas Tuhel nuk u duk aspak i mërzitur, gjithsesi, pasi me zgjuarsinë e tij e dinte që më parë se ku ishte limiti i të tijve.
Në “Arenën e Shalkes”, Bundesliga pati një nga ndeshjet më të bukura, duel që u luajt shumë për tifozët.
Të dyja skuadrat kanë tifozeritë më të zjarrta në Gjermani.
Dortmundi kryesoi dy herë, fillimisht me golin e Kagauas, dhe pastaj me atë të Ginterit.
Shalke, jo në nivelin e rivalëve, pati karakterin që u përgjigj në çdo rast. Sane dhe Huntelar me penallti, rivendosën ekuilibrin.
Borusia, e sigurt se do të luajë në Champions sezonin e ardhshëm, ka tani vetëm një objektiv real, të kalojë Liverpulin në “Anfild” dhe të vazhdojmë të shpresojë fitoren e trofeut në Ligën e Europës.
Shalke, ndërkaq, me anë të barazimit mbeti me shpresë që të shkojë në Europë, pse jo në Ligën e Kampionëve.
