Dorëzohet në polici 24-vjeçari që dhunoi mjekun e spitalit të Lezhës, Zef Doda. Eduart Lleshi, është paraqitur në komisariatin e policisë së Lezhës në orët e vona të pasdites së sotme.
Në deklarimin e parë para uniformave blu, mësohet se Lleshi ka pranuar se ka goditur mjekun me grusht. Sipas tij, gjithçka ndodhi pas debatit që pati me të për mungesë shërbimi.
“Mjeku nuk po më shërbente, ishte i dehur. Debatova me të dhe e godita me grusht”, ka thënë ai.
Mësohet se mjeku Zef Doda ndodhet në një gjendje të rënduar, me shumë plagë në trup. Ai u trajtua në spitalin rajonal të qytetit të Lezhës dhe pastaj u dërgua për një kurim më të specializuar në Spitalin e Traumës në Tiranës.
Vetëm pak javë më parë, një tjetër mjek u dhunua në spitalin e Durrësit nga dy pacientë të dehur.
Po ashtu Ministria e Shëndetësisë ka propozuar edhe një sërë masash që pacienti të mos shoqërohet nga familjarët në dhomën e urgjencës si dhe vizitat të jenë me një orar të caktuar, por siç duket këto masa deri tani nuk kanë rezultuar efikase./B.K Opinion.al
