Dy autorët e dyshuar të vrasjes së shqiptarit Viktorjan Picaku iu dorëzuan autoriteteve italiane rreth orës 22:00 të së enjtes. Ata janë dy italianë nga provinca e Corato-s, megjithatë mediat italiane nuk kanë bërë publik identitetet e tyre. Ata iu dorëzuan hetuesve pas disa orësh arrati.
Mbrëmjen e së mërkurës dy autorët e dyshuar vranë Viktorjan Picakun, 24 vjeç nga Mirdita. Ata lëvizën me një motor “Vespa” të zi dhe e qëlluan të paktën katër herë Picakun në sheshin “Abbazia” në Corato në një ngjarje ku dëshmitarë kanë qenë shumë njerëz.
Deri më tani nuk dihen shkaqet e vrasjes së 24-vjeçarit. Autoritetet nuk kanë përjashtuar mundësinë e një krimi për shkak të një vajze. Të enjten familjarët e tij thanë se disa ditë më parë, ai kishte ndërhyrë për të mbrojtur një vajzë pasi po dhunohej nga një italian.
Ata thanë se ky fakt mesa duket se nuk ishte pranuar nga italiani, i cili mbrëmjen e së mërkurës mori hak ndaj të riut, duke i marrë atij jetën. Picaku nuk kishte gjithashtu precedentë të mëparshëm penalë. Ai kishte vetëm një vit që kishte shkuar në Itali për të punuar për një jetë më të mirë.
