Ngjarja e 15-vjeçares në Rumania që u gjet e vrarë pasi ishte rrëmbyer shkaktoi një valë protestash masive pasi u zbulua se ajo kishte telefonuar disa herë policinë për ndihmë. Si pasojë e këtyre protestave Ministri i Brendshëm rumun, Nicolae Moga dha dorëheqjen.
Alexandra Macesanu u rrëmbye ndërsa bënte autostop në afërsi të qytetit Caracal. Ajo gjeti mundësinë të telefonojë disa herë policinë duke treguar zonën se ku ndodhej, por polici në shërbim i kishte thënë të qëndronte aty ku ishte e të mos ia bllokonte më linjën.
Pas 19 orësh nga raportimet e të miturës, policia lokalizoi shtëpinë ku gjendej trupi i pajetë i saj. Nga ekspertiza mjeko-ligjore rezultoi se 15-vjeçarja ishte përdhunuar përpara se të vritej. Autori i ngjarjes së rëndë ishte një mekanik 65 vjeçar Gheorghe Dinca, i cili ka pranuar tashmë vrasjen e Alexandrës.
Pas kësaj ngjarje u shkarkua menjëherë kreu i policisë por kjo gjë nuk e qetësoi opinionin publik i cili shpërtheu në protesta duke lëshuar akuza drejt policisë vendase për paaftësi por edhe ndaj prokurorëve, ministrit të Brendshëm dhe kryeministres.
“Të gjithë duhet të mbajnë përgjegjësi. Që nga polici që nuk ndërhyri në kohë, tek prokurori që nuk i lejoi të hynin në pronën e dyshuar, tek kreu i policisë e madje edhe tek vetë kryeministrja Dancila”, u shpreh një protestues.
Ministri i Brendshëm Moga deklaroi se kishte vendosur te paraqiste dorëheqjen për të shpëtuar një pjesë të prestigjit të institucionit që drejtonte, e që sipas tij, ishte dëmtuar rëndë nga mangësitë e disa punonjësve të tij. /Opinion.al
