Pas dorëheqjes së drejtuesve të katër prokurorive të rretheve Lezhë, Dibër, Tropojë e Përmet, Prokuroria e Përgjithshme njofton një valë ndyshimesh, që priten të ndodhin në ditët në vijim.
Këto ndryshime diktohen kryesisht nga nevoja për të përmirësuar rezultatet në ndjekjen penale, si edhe për shkak se prokurorë të ndryshëm kanë vite në pozicione të caktuara, në nivel drejtuesish dhe zv.drejtuesish prokurorie, si në Prokurori Rrethi, ashtu edhe në Prokurori Apeli.
Gjithashtu, riformatim pritet të ketë edhe në Prokurorinë e Përgjithshme. Riorganizimi do të realizohet në disa faza, ku fillimisht po shqyrtohen mundësitë në ato njësi të prokurorisë, në të cilat vlerësohet se ka nevojë për ndërhyrje në një kohë sa më të shpejtë.
Prokuroria e Pergjithshme, pas analizave vjetore të zhvilluara në fillim të vitit 2016, ka krijuar një pamje të qartë mbi problematikat e aktivitetit.
Në përfundim, është vlerësuar si domosdoshmëri rifreskimi i një pjese të strukturës së Prokurorisë, proces i cili pritet të realizohet periodikisht në ditët dhe javët e ardhshme./tvklan.al
