Donald Trump është betuar si Presidenti i 45 i Shteteve të Bashkuara të Amerikës. Tashmë nis zyrtarisht era Trump.
Ka nisur menjëherë fjalimin e tij duke bërë thirrje për bashkim mes të gjithë amerikanëve. Fjalimi ka zgjatur vetëm 16 minuta dhe ka pasur kryefjalë fjalën Amerika e Para kudo.
Donald Trump, ka falenderuar Presidentin Barack Obama dhe Zonjën e Parë Michele Obama për tranzicionin e qetë dhe të butë të pushtetit.
Menjëherë në fjalimin e tij Trump ka deklaruar se qytetarët janë përfituesit direkt të këtij eventi pasi ata u tradhëtuan nga politika dhe establishment.
Duke folur qetësisht me zë të shtruar Trump ka theksuar se kjo fitore është e paparë dhe në qendër të kësaj lëvizje ka qenë shërbimi ndaj qytetarëve.
Çdo vendim që do të merret tani e tutje do të merret sipas parimit Amerika e Para. Do të mbrohen punonjësit tanë në tregti dhe vende pune.
Nuk do t’ju lë asnjëherë të braktisur. Amerika që sot ka nisur të fitojë si asnjëherë tjetër. Do të sjellim punë, prosperitet dhe ëndrrat tona. Do të ndërtojmë rrugë dhe infrastruktura të reja kudo në vendin tonë të bukur.
Nuk ka rëndësi nëse jemi të bardhë, brunë apo të zinj, e rëndësishme është se tek secili rrjedh gjak i kuq patriotik. Të gjithë kemi të njëjtat ëndrra dhe besime.
Të gjithë bashkë do ta bëjmë Amerikën krenare sërish, dhe të Madhe sërish. Zoti e bekoftë Amerikën.
Trump e nisi ditën e tij më të rëndësishme me një vizitë në meshën e mbajtur orët e mëngjesit, e më pas me një vizitë në Shtëpinë e Bardhë, ku u prit nga presidenti në largim Barack Obama dhe bashkëshortja e tij, Michelle.
Presidenti Trump dhe zv.presidenti Mike Pence marrin zyrtarisht çelësat e Shtëpisë së Bardhë për të drejtuar kështu Shtetet e Bashkuara të Amerikës për 4 vitet e ardhshme si presidenti i 45-të në historinë e vendit, pas ceremonisë së nisur nën prezantimin e shefit amerikan të Drejtësisë, John Roberts.
“Gjithçka nis sot!”, ishin fjalët e para të Trumpit të publikuara në “Twitter” në 7 e 30 të mëngjesit me orën lokale, e më pas i ftonte ndjekësit e tij të ritakoheshin më 11 në ceremoninë e betimit. “Lëvizja vazhdon, puna sapo nis tashmë”.
Vetëm pak metra larg Capitol Hill, aktivistë të maskuar marshuan përmes rrugëve dhe thyen xhamat e disa bizneseve dhe makinave nëpër rrugë, e pati edhe përleshje me policinë duke hedhur bomba molotov, me forcat e rendit që u përgjigjën me gaz lotsjellës e më pas me përdorimin e forcës.
Trump merr kështu pushtetin në një vend të përçarë pas një fushate elektorale tepër të ashpër. 70-vjeçari i njohur si manjat i pasurive të patundshme do të ketë përpara një detyrë të vështirë për të forcuar imazhin e tij. Gjatë fazës tepër sfiduese së tranzicionit, që prej fitores së zgjedhjeve në nëntor, miliarderi njujorkez shfrytëzoi “Twitter”-in për të sulmuar vazhdimisht kritikët e tij, aq sa njëri prej senatorëve republikanë, John McCain, i tha CNN-it se Trump duket se kërkon të përballet me çdo “mulli ere” që gjen përpara.
Ardhja e tij në krye të Shtëpisë së Bardhë, përveçse mirëpritet nga republikanët e lodhur nga 8 vitet e Barack Obamës në pushtet, ngre pikëpyetje për një sërë çështjesh për Amerikën.
Të pranishëm, mes shumë e shumë figurave të shquara të politikës amerikane ndër vite, ishte edhe rivalja e Trumpit në zgjedhjet e nëntorit, Hillary Clinton, e shoqëruar nga bashkëshorti i saj, ish-presidenti Bill Clinton.
