Presidenti i zgjedhur i Shteteve të Bashkuara të Amerikës Donald Trump është takuar sot me njërin prej kritikëve të tij më të mëdhenj, Mitt Romney.
BBC raporton se Romney mund të emërohet nga Trump Sekretar Amerikan i Shtetit. Takimi mes tyre zgjati rreth 80 minuta, ndërsa Romney nuk dha detaje të bisedimeve por tha vetëm se folën për shumë çështje.
Mitt Romney ka qenë kandidati i republikanëve në zgjedhjet presidenciale në vitin 2012 dhe humbi përballë Barack Obamës.
Gjatë kësaj fushate presidenciale, Romney e quajti Donald Trump një “mashtrim”, ndërsa Donald Trump tha se Mitt Romney ishte kandidatura më e keqe ndonjëherë në vitin 2012.
Deri tani Trump ka bërë disa emërime në poste kryesore. Për postin e Sekretarit të Shtetit është përfolur gjithashtu edhe ish-kryebashkiaku i Nju Jorkut, i cili nuk ka eksperiencë për politikën e jashtme. Presidenti i zgjedhur Donald Trump është duke krijuar kabinetin e tij pas fitores së zgjedhjeve.
