Ndërsa mbante fjalimin, Trump ka marrë edhe urimet e para nga arena ndërkombëtare.
Ka qenë kryeministri izraelit Benjamin Netanyahu që e ka uruar dhe ai hungarez, Viktor Orban.
“Të dashur Donald dhe Melania Trump, Urime për rikthimin më të madh në histori!
Kthimi juaj historik në Shtëpinë e Bardhë ofron një fillim të ri për Amerikën dhe një riangazhim të fuqishëm ndaj aleancës së madhe midis Izraelit dhe Amerikës.
Kjo është një fitore e madhe!
Miqësisht, Benjamin dhe Sara Netanyahu”, shkruan kryeministri izraelit.
Ndërsa Orban shkruan në X: “Rikthimi më i madh në historinë politike të SHBA-ve! Urime Presidentit Donald Trump, në fitoren e tij të madhe. Një fitore shumë e nevojshme për Botën!”.
Po ashtu edhe zëdhënësja e Ministrisë së Jashtme të Kinës, Mao Ning, tha se respekton zgjedhjet e popullit amerikan dhe se politika e Kinës ndaj Shteteve të Bashkuara është e qëndrueshme.
“Zgjedhjet presidenciale janë çështje të brendshme të SHBA-së dhe ne respektojmë zgjedhjen e popullit amerikan. Politika jonë ndaj Shteteve të Bashkuara është e qëndrueshme dhe ne do të vazhdojmë t’i shikojmë dhe menaxhojmë marrëdhëniet në përputhje me parimet e respektit të ndërsjellë, bashkëjetesës paqësore dhe dhe bashkëpunimit të favorshëm”, tha zëdhënësja e Ministrisë së Jashtme Mao Ning.
