Donald Trump u duk fillimisht se pas fitores do të hiqte dorë nga disa premtime të tij të bëra gjatë fushatës elektorale.
Por, duket se ai është i vendosur sa i takon dëbimit të emigrantëve të paligjshëm. Trump thotë se do të dëbojë 2 deri në 3 milionë emigrantë që nuk kanë dokumentacionin e nevojshëm menjëherë sapo të marrë detyrën.
Një deklaratë të tillë, Trump e bëri në të parën intervistë televizive pas fitores së zgjedhjeve. Presidenti i zgjedhur theksoi se do të mbajë politika të ashpra ndaj emigracionit dhe gjithashtu këmbënguli në ndërtimin e murit në kufi me Meksikën.
“Ajo çfarë do të bëjmë është që njerëzit që janë kriminelë dhe që kanë precedentë, janë pjesë e bandave, shitës droge, që ka shumë të tillë, ndoshta 2 milionë apo edhe 3 milionë, ne do t’i shporrim nga vendi ynë ose do t’i burgosim”, u shpreh Trump.
Ai shpjegoi se pasi fillimisht të sigurohet kufiri, Zyra e Emigracionit dhe punonjësit e doganave do të procedojnë me kontrollin e statusit të emigrantëve pa dokumente në vend.
