Donald Trump është shprehur në një podcast se ai ka një “plan konkret” për t’i dhënë fund luftës në Ukrainë , por nuk do ta zbulojë tani atë.
“Nëse fitoj, si president i zgjedhur, do të bëj një marrëveshje të garantuar. Kjo është një luftë që nuk duhej të ndodhte,” tha Trump në podkastin e Lex Fridman.
“Por unë nuk mund t’jua zbuloj këto plane, sepse nëse jua them, nuk do të jem në gjendje t’i përdor dhe do të dështojnë. E dini, një pjesë e kësaj është surprizë, apo jo?”, shtoi ai.
Trump ka deklaruar shumë herë se do t’i jepte fund luftës midis Rusisë dhe Ukrainës “brenda 24 orëve”, pa shpjeguar kurrë se si. Në muajt e fundit, megjithatë, ai ka kritikuar Uashingtonin për miliarda dollarët që shpenzon për të mbështetur Kievin dhe po i kërkon Evropës të luajë rolin e saj.
Ish-presidenti i SHBA-së dhe kandidati aktual republikan është i përfshirë në një garë kokë e kokë me rivalen e tij demokrate, nënpresidenten Kamala Harris.
