Ambasadori amerikan në Tiranë, Donald Lu ka bërë apel për qasje ndryshe të viktimave që kanë rënë pre e trafikimit.
Lu gjatë një diskutimi me studentë të Universitet “Ismail Qemali” në Vlorë, tha se vajzat e trafikuara nuk kanë bërë asnjë gjë të keqe, por janë thjeshtë viktima duke kërkuar kështu që të mos braktisen nga familja.
“Ata janë njerëzit më guximtarë që kam njohur. Disa janë mashtruar, por disa kanë pasur kurajën që t’i shpëtojnë skllavërisë. Fatkeqësisht disa prej familjeve nuk e kuptojnë që ato nuk kanë bërë asgjë të keqe dhe se janë viktima”, deklaroi Lu.
Gjatë vitit 2016, në qytetin e Vlorës ka pasur 12 raste trafikimi, ndërsa janë 7 persona të arrestuar.
Elona Gjebre, zv.ministre e Brendshme e ka cilësuar si një plagë të shoqërisë shqiptare trafikimin e personave, por sipas saj lufta ndaj këtij fenomeni mbetet prioriteti kryesor i qeverisë.
