Ambasadori amerikan Donald Lu ashtu si për rastin e lirimit të Lulzim Berishës ka folur hapur edhe për mosarrestimin e Klement Balilit. “Ua kam kërkuar autoriteteve shqiptare prej 7 muajsh por ata nuk duan ta arrestojnë” tha ai. Donald Lu tha se policia dështoi ta arrestojë, ndërsa prokurori vonoi urdhër-arrestin 7 muaj me radhë. Sipas tij trafikantët e drogës në Shqipëri janë të lidhur me shtetin. SHBA, theksoi ai, ka kërkuar gjithnjë arrestimin e ‘peshqeve të mëdhenj’, të drogës, krimit të organizuar dhe korrupsionit në nivelet e larta.
Më poshtë deklarata e plotë e ambasadorit amerikan në vendin tonë Donald Lu.
“Shqipëria do të ishte vend më i mirë nëse politikanët nga e majta dhe nga e djathta nuk do ti shërbenin interesave të fuqishme të biznesit të korruptuar, trafikantëve dhe kriminelëve të mëdhenj.
Ndyshe, si mund ta shpjegojmë faktin se Klement Balili është ende i lirë?
Sipas medias ai ka shmangur 200 policisë gjatë një ndjekjeje. Sipas të vëllait, ai lëviz lirisht në rrugët e Tiranës.
Zyra e Prokurorit të Përgjithshëm nuk kishte urdhëruar, arrestimin e tij deri të premten e kaluar. Mosarrestimi i ish-zyrtarit të Sarandës, Klement Balilit është dështim i madh i policisë dhe gjithë sistemit të drejtësisë.
Kanë kaluar 7 muaj që kur policia në Greqi arrestoi trafikantët e drogës të lidhur me Balilin. Që prej 7 muajsh policia greke e ka shpallur në kërkim Balilin. Kanë kaluar 7 muaj që kur Ministria e Drejtësisë shqiptare dërgoi persona në Greqi për këtë çështje. Tani kanë 10 mijë faqe dokumente.
I kam kërkuar prej 7 muajsh zyrës së prokurorit ta arrestojnë.
Kam nxitur prej 7 muajsh Ministrin e Brednshëm, ministrin e Drejtësisë dhe Kryeprokurorin që ta arrestojnë Balilin.
Nëse Shqipëria nuk mund ta kapë Balilin dhe peshqit e tjerë të mëdhenj kush do të donte të punonte me Shqipërinë? Kush do të besonte se është një vend serioz?
Shtetet e Bashkuara i kanë thënë Shqipërisë se bashkëpunimi ynë i ardhshëm kundër narkotikëve është i kushtëzuar nga arrestimi dhe procedimi penal i peshqve të mëdhenj nga ana e Shqipërisë, përfshirë edhe Klement Balilin”.
