Kryeprokurori Adriatik Llalla është njohur nga afër me aktet e hetimit të prokurorisë italiane për çështjen “Habilaj”. Në dokumentin që ka siguruar Opinion.al shkruhet se “hetuesit e Katanias kane qenë pak ditë më parë me një mision në Tiranë (Shqipëri)”.
“Oficerët e policisë gjyqësore të ndihmuar nga Interpol dhe Guardia Finanza dërguan aktet që lidhen me hetimin e grupit “Habilaj”, Prokurorit të Përgjithshëm të Shqipërisë. Ata kanë kërkuar ndihmë për arrestimin e një prej katër të akuzuarve me kombësi shqiptare që nuk ndodhej në shtetin italian dhe kanë dorëzuar urdhër-arrestet ndërkombëtare të lëshuara me kërkesë të prokurorit të Katanias”, thuhet në dokumentin në fjalë.
Referuar këtij dokumenti mësojmë se pas kërkesës së prokurorisë së Katanias është arrestuar në Tiranë Nezar Seiti (datlindja 03.30.1977). “Ai kishte detyrën për sigurimit e logjistikës në trafikun e drogës që kryesohej nga Mosi Habilaj (1978). Pjesë e këtij trafiku janë edhe anëtarët Maridian Sulaj (1988) dhe Fatmir Minaj (1962) tashmë nën arrest që nga 14 tetori”, thuhet në dokument.
Organizata kriminale në fjalë dyshohet se ka dërguar nga Shqipëria në Itali një sasi prej rreth 4 000 kg marijuanë (e sekuestruar). Janë sekuestruar gjithashtu kallashnikovë dhe qindra municione. Sasia e madhe e drogës që trafikonin Habilajt kap në treg vlerën e 20 milionë eurove. /Opinion.al
