Një gazetar i medias shqiptare i është drejtuar Policisë së Shtetit, pas kërcënimeve të vazhdueshme që merrte në adresë të tij, përmes rrjetit social Facebook nga një profil me identitet të rremë.
Menjëherë pas denoncimit të gazetarit, policia ka nisur hetimet duke bërë gati dhe dosjen e kallëzimit penal me të gjitha të dhënat e mbledhura, duke ia dërguar organit të prokurorisë pranë gjykatës së shkallës së parë në Tiranë, për hetime të mëtejshme.
Mësohet se kërcënimet kishin të bënin për qëndrimet e gazetarit dhe shkrimet e tij. Kështu që, policia i adresoi prokurorisë së Tiranës një emër të mundshëm si autor i kërcënimit. Por nuk mund të shkonte më tej. Është kjo e fundit, që vazhdon hetimin për gjetjen e autorit të kërcënimit për jetën e gazetarit.
Në dosjen e përpiluar, Policia e Shtetit, ka theksuar se mund të jetë person me rrezikshmëri, gjithashtu ka bashkëngjitur edhe disa hollësi shtesë.
Ndërkaq, prokurori i çështjes, Erjon Imeraj, i ka rënë shkurt duke vendosur mosfillimin e procedimit penal të kallëzimit nr.6154 të vitit 2017! Imeraj shkruan se ndodhemi para fakteve të “fyerjes” dhe si konkluzion paditësi, t’i drejtohet gjykatës për të kërkuar dëmshpërblim.
Interpretim ky që lë shumë hapësirë nga mënyra se si është argumentuar, për vetë faktin, se kërcënuesi nuk është as identifikuar dhe jo kapur nga organët kompetente dhe për rrjedhojë, i dëmtuari nuk ka se kujt t’ia kërkojë dëmshpërblimin.
