Banka e Shqipërisë deklaroi se 10 depozituesit më të mëdhenj në Shqipëri kanë rreth 450 milionë dollarë të kursyera në banka. Të dhënat bëhen publike në raportin vjetor të mbikëqyrjes për vitin 2015. Edhe pse Banka, vëren se përqendrimi i depozitave u ul vitin e kaluar, sërish pesha që zotërojnë 10 depozituesit e mëdhenj mbetet e konsiderueshme.
“Në dhjetor 2015, dhjetë depozituesit më të mëdhenj zënë 4.8% të totalit të depozitave të sistemit bankar, kundrejt 6.13% që zinin në dhjetor 2014,” vëren Banka e Shqipërisë.
Sipas të dhënave zyrtare të Bankës Qendrore, në dhjetor 2015, vlera totale e depozitave të sistemit arrin 1.1 trilionë lekë, me një rritje vjetore prej 2.8%. Kjo do të thotë se 10 depozituesit më të mëdhenj zotërojnë në total rreth 53.8 miliardë lekë ose gati 450 milionë dollarë.
Polarizim i lartë
Sipas raportit vjetor të Agjencisë së Sigurimit të Depozitave pjesa më e madhe e depozitave zotërohen nga vetëm një përqindje e vogël depozituesit. Më konkretisht, sipas AS, vitin e kaluar 4 për qind e individëve depozitues në Shqipëri zotërojnë plot 4.1 miliardë dollarë depozita në banka.
Këta janë depozituesit e mëdhenj, të cilët zotërojnë dhe pjesën e “luanit” në kursimet kombëtare. Sipas ASD-së, vitin e kaluar, mbi 58 për qind e totalit të depozitave në sistemin bankar zotëroheshin nga vetëm 4 për qind e individëve. Kjo do të thotë se, pjesa tjetër, pra 96 për qind e individëve ndajnë mes tyre 42 për qind të totalit të kursimeve.
Të dhënat e detajuara të ASD-së tregojnë se, në fund të vitit të kaluar, individët zotëronin në total rreth 890 miliardë lekë depozita në banka. Sipas monedhave, 51 për qind e tyre janë në Lek, ndërsa pjesa tjetër janë kursime në valutë.
Legjislacioni shqiptar në fuqi detyron që agjencia e depozitave të sigurojë plotësisht çdo depozitë bankare deri në 2.5 milionë lekë dhe të dhënat zyrtare tregojnë se, 96 për qind e individëve janë plotësisht të siguruar, pasi bien nën këtë nivel.
