Vilson Meshi, babai i tre fëmijëve, pak kohë më parë u gjet i djegur në automjetin e tij në Basildon të Britanisë së Madhe, por vdekja e tij mbetet ende mister.
Autoritetet hetimore në Britani janë duke vëzhguar me kujdes një video të filmuar pak pas ngjarjes, ku një person shihet me biçikletë në zonë.
Identiteti i personit të kapur nga kamerat filmike nuk dihet ende.
“Ne mbetemi të angazhuar për të gjetur ata që janë përgjegjës për vdekjen e z. Meshi dhe u bëjmë thirrje qytetarëve që të shohin videon nëse mund ta njohin personin në fjalë”, tha Stephen Jennings nga drejtoria e krimeve të rënda.
Për të gjithë ata që kanë informacion u kërkohet që të dërgojnë të dhënat pranë policisë kundrejt një shpërblimi prej 5 mijë paundësh britanikë.
Në video ky person shihet me bluzë dhe me kapuç teksa tenton të hapë makinën e parkuar të shqiptarit 30 vjeçar Meshi.
Sipas ekzaminimeve vdekja e shqiptarit erdhi pas asfiksimit nga tymi.
