Policia e Sarandës ka vënë në pranga personin që dogji dy ditë më parë makinën e biznesmenit Qirjako Gjini.
Burime të policisë bëjnë me dije se pas hetimeve të kryera në lidhje me djegien e automjetit “Range Rover” në lagjen nr.4, më datë 02.08.2019, kanë bërë të mundur identifikimin dhe kapjen e autorit të dyshuar, shtetasin Ylli Kola, 25 vjeç, banues në fshatin Toç, Tepelenë.
Ai është identifikuar nga kamerat e sigurisë së bizneseve duke blerë benzinë në një pikë karburanti për të djegur më pas makinën.
I riu rezulton me precedentë të mëparshëm penal, ndërsa paraprakisht dyshohet se ai ishte paguar për djegien me benzinë të automjetit të biznesmenit.
Materialet iu referuan Prokurorisë në ngarkim të tij për veprën penale “Shkatërrimi i pronës me zjarr”. /Opinion.al
