Një grua është ndaluar nga policia e Durrësit pasi në bashkëpunim me vëllain e saj akuzohen se kanë djegur një automjet në këtë qytet në pronësi të shtetasit me inicialet K. S., 42 vjeç.
Motër e vëlla kanë tentuar edhe djegien e banesës së 42-vjeçarit, por nuk kanë arritur ta realizojnë. Policia ka shpallur në kërkim vëllain e gruas së arrestuar, ndërsa është proceduar penalisht dhe një shtetas italian, për moskallëzim krimi.
Sipas të dhënave jozyrtare dyshohet se gruaja kishte një raport disavjeçar me 42-vjeçarin, por kishte zbuluar se ai komunikonte me gra të tjera. 41-vjeçarja jetonte në Itali ku kishte dhe një qendër estetike, ndërsa besohet se makinën që dogji dhe apartamentin i thehte blerë ajo dhe i kishte regjistruar në emër të partnerit të saj.
NJOFTIMI I POLICISE
Finalizohet operacioni policor i koduar “Fiery revenge”. I vuri zjarrin automjetit të një 42-vjeçari, kapet dhe vihet në pranga 41-vjeçarja. Shpallet në kërkim vëllai i 41-vjeçares, pasi bashkëpunoi me të, për diegien e automjetit. Pas djegies së automjetit, 41-vjeçarja ka tentuar të djegë edhe banesën e 42-vjeçarit, por s’ka mundur ta realizojë dot.
Procedohet penalisht dhe një shtetas italian, për moskallëzim krimi. Sekuestrohet 1 celular dhe automjeti i përdorur në ngjarje. Specialistët për Hetimin e Krimeve të Komisariatit të Policisë Durrës, menjëherë pas marrjes së kallëzimit nga shtetasi K. S., 42 vjeç, për djegien e automjetit të tij, kanë organizuar punën me qëllim zbardhjen e plotë të rrethanave dhe shkakut të djegies së mjetit. Nga veprimet e shpejta hetimore të kryera nga Policia, rezultoi se djegia e automjetit ishte e qëllimshme. Në këtë kuadër, u organizua operacioni policor i koduar “Fiery revenge”, për identifikimin dhe kapjen e autorëve të kësaj zjarrvënieje.
Falë veprimeve të shpejta profesionale dhe hetimore u siguruan prova për autorësinë dhe mekanizmin e ngjarjes. Në kuadër të operacionit u kap dhe u vu në pranga shtetasja D. S., 41 vjeçe, banuese në Tiranë, u shpall në kërkim vëllai i saj. shtetasi M. S., 35 vjeç, banues në Tiranë, si dhe nisi procedimi në gjendje të lirë për shtetasin italian F. C., 58 vjeç, për moskallëzim krimi. Nga veprimet hetimore dyshohet se për shkak të një konflikti të mëparshëm, 41-vjeçarja, në bashkëpunim me vëllanë e saj, i kanë vënë zjarrin automjetit të 42-vjeçarit, ndërsa shtetasi italian ka patur djeni për ngjarjen, por nuk ka kallëzuar krimin. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
