Kryetari i Grupit Parlamentar të PD, Gazment Bardhi në një deklaratë për mediat tha se do t’i qëndrojnë mocionit për debat për çështjen e “Xibrakës”.
Bardhi tha se mocioni me debat është i detyrueshëm, ndërsa theksoi se kryetarja e Parlamentit duhet të propozojë një datë dhe brenda 30 ditëve nga momenti i paraqitjes duhet të zhvillohet.
Kreu i Grupit të PD, pretendon se vëllai i kryeministrit Rama, Olsi Rama është i përfshirë në laboratorin e dogës së “Xibrakës”.
“Mocioni jonë bazohej në të dhëna konkrete të raporteve ndërkombëtare që e listojnë Shqipërinë në krye të vendeve problematike, për transport droge, ishte terezish i bazuar në të drejtën për të kërkuar mocion në përputhje me rregulloren. Kur bëhet fjalë për drogë qytetarëve i shkon mendja tek vëllai i kryeministrit Rama, Olsi Rama dhe kur bëhet fjalë për Olsi Ramën janë gati të shkrijnë kuvendin e Shqipërisë, rregulloren e Kuvendit dhe kushtetutën. Siç shkrinë javën e kaluar për llogari të Olta Xhaçkës, shkrinë gjykatën kushtetuese.
Ne do t’i qëndrojmë mocionit që kemi paraqitur. E vetmja kompetencë që ka kryetarja e Kuvendit është të propozojnë një datë, por mocioni është i detyrueshëm brenda 30 ditëve nga momenti i paraqitjes”,-tha Bardhi.
