Detaje të reja janë zbuluar nga tentativa për trafikim të armëve të zjarrit nga Kapshtica drejt Greqisë. Në Kapshticë automjeti u përzgjodh për kontroll në vijën e dytë pas analizës së riskut.
Sipas asaj që ka mësuar gazetarja Daniela Zisi, kontrollorët i bënë pyetje shoferit i cili shfaqi pasiguri. Më pas automjeti u kalua në vijë të dytë për kontroll të detajuar. Destinacioni i armëve, sipas hetimeve, ishte Selaniku.
Dy të arrestuarit gjatë marrjes në pyetje nga specialistët për Hetimin e Trafiqeve të Paligjshme të DVP Korçë mohuan se kishin lidhje me njëri-tjetrin për trafikimin e armëve.
Por pretendimet e tyre janë të pavërteta pasi Policia gjeti dhe sekuestroi prova që faktonin bashkëpunimin mes dy të arrestuarve, konkretisht mesazhe dhe video mes njëri-tjetrit kur sajonin vendin në automjet për të fshehur armët.
Videot e mesazhet u gjetën në telefonin e njërit prej dy të arrestuarve. Videot e mesazhet janë administruar si prova materiale. Armët i kishte siguruar 41-vjeçari nga Tepelena, por me banim në Tiranë./Klan News
