Qëndron apo largohet? Kjo nuk është një dilemë shekspiriane, por fati në dyshim i mesfushorit James Rodriguez. Mesfushori i Real Madridit vazhdon të jetë zëvendësues në formacionin e teknikut Zinedine Zidane. Lojtarë si Marco Asensio apo Isco shihen më në gjendje për të luajtur sesa ai. Kolumbiani e nisi nga stoli edhe ndeshjen e fundjavës kundër Celta Vigos, fituar 2-1 nga kampionët e Evropës. Ai zëvendësoi kroatin Luka Modric në gjysmën e pjesës së dytë, duke rikonfirmuar se nuk është zgjedhje e parë e francezit Zizu.
“Kam parë gjëra të mira nga James dhe, ashtu si thoni ju, po, ai do të qëndrojë“, – tha Zidane gazetarëve në konferencën për shtyp pas ndeshjes. Duke reflektuar për fitoren e skuadrës së tij në “Santiago Bernabeu”, trajneri i “Galaktikëve” u shpreh i kënaqur me efektin që patën lojtarët zëvendësues në lojë. “Doja që të besonim deri në fund dhe ia arritëm. Ndryshimet që bëmë shërbyen për të shtuar diçka ekstra”, – përfundoi Zidane.
