“Çfarë cinizmi treguan bastardët në Kremlin. Ata thanë se ishte një mbrojtje ajrore e supozuar e Ukrainës dhe jo një sulm me raketa e shënjestruar mirë”.
Kështu ka deklaruar Presidenti i Ukrainas Volodymyr Zelensky në një konferencë për shtyp në Varshavë pas sulmit rus i cili goditi spitalin e fëmijëve në Kiev dhe la të vdekur rreth 31 persona.
Zelenskyy premtoi hakmarrje ndaj Vladimir Putin dhe shpurë së tij të cilët orkestruan dhe urdhëruan sulmin ndaj spitalit pediatrik në Ukrainë.
Ndërsa liderët botërorë përgatiten për samitin e NATO-s në Uashington, Zelenskyy u bëri thirrje aleatëve të Kievit që t’i japin një përgjigje të vendosur sulmit të së hënës në një konferencë për shtyp që filloi me një minutë heshtje për viktimat.
Moska nga ana e saj ka mohuar vazhdimisht se ka shënjestruar civilët dhe infrastrukturën civile, megjithëse sulmet e saj kanë vrarë mijëra civilë që kur nisi pushtimin në shkallë të plotë në shkurt 2022.
“Ne do të hakmerremi kundër këtyre njerëzve, do t’i japim një përgjigje të fuqishme nga ana jonë Rusisë. Pyetja për partnerët tanë është: a mund të përgjigjen ata? Përtej çdo dyshimi, ne do të rindërtojmë gjithçka që këta terroristë kanë shkatërruar. Dhe përtej çdo dyshimi, ne do t’u përgjigjemi këtyre të egërve nga Rusia”.
Lideri i Ukrainës njoftoi gjatë konferncës për shtyp me Kryeministrin polak, Donald Tusk formimin e marrëveshjes dypalëshe për bashkëpunimin e sigurisë si dhe për formimin e një legjioni ushtarak ukrainas në Poloni, i hapur për qytetarët ukrainas që jetojnë në Poloni dhe që do të donin vullnetarisht të bashkoheshin në mbrojtjen e vendit të tyre.
Sakaq, vendet europiane ndodhen në dilemë për sa i përket liderit kokfortë të Hungarisë, Viktor Orban. Në një intervistë për të përditëshmen gjermane, Bild, Orban tha se, “Disfata e Rusisë është e vështirë të imagjinohet.
Probabiliteti që Rusia të mund të mposhtet është krejtësisht i pallogaritshëm”, tha ai për Bild. Por Kryeministri i Polonisë, Donald Tusk kishte një mesazh për homologun e tij Orban.
“Këto fjalë ia kushtoj Viktor Orbanit. Historia kujton politikanët që bindën veten dhe të tjerët se po punonin për paqen e drejtë dhe de facto, po punonin për kapitullim dhe këta politikanë hynë në histori në faqet e turpit”.
