Ish-kryeministri, Sali Berisha, ka dalë në një dalje për mediat nga selia blu pasi opozita dhe koalicioni që ai drejton shënoi një disfatë të thellë në zgjedhjet e 14 Majit. I pyetur nga gazetarët se a do e njohë rezultatin e zgjedhjeve, Berisha tha se këto zgjedhje ishin procesi më i shëmtuar në histori, ku qytetarët votuan nën presione. Ai theksoi se në bazë të kësaj koalicioni “Bashkë Fitojmë” do marrë të gjitha vendimet.
“Unë po flas qartë. Kemi të bëjmë me procesin më të shëmtuar në historinë e vendit. Kemi të bëjmë me një proces në të cilin qytetarët shqiptarë nuk votuan të lirë. Në të cilin u bënë presione të gjithanëshme dhe mbi bazën e kësaj PD dhe koalicioni do të marrë të gjitha vendimet.
Qeveria dështoi në çdo përpjekje për ta asgjësuar atë përveç ndryshimit të rezultatit të zgjedhjeve kur bleu vota me 300 euro, kur operatori në votimin elektronik votonte për zgjedhësin etj etj. Po këto ne i kemi të gjitha të dokumentuara”-tha Berisha.
